ప్రజా సమస్యల పరిష్కారంలో సర్కార్ విఫలం.. కదం తొక్కిన సీపీఎం!

ప్రజా సమస్యల పరిష్కారంలో సర్కార్ విఫలం.. కదం తొక్కిన సీపీఎం! • జహీరాబాద్ ఆర్డీవో కార్యాలయం ఎదుట సీపీఎం ఆధ్వర్యంలో ధర్నా, వినతిపత్రం అందజేత. • విద్యా, వైద్య రంగాలను గాలికొదిలేశారని ఏరియా కార్యదర్శి రాంచందర్ ఆగ్రహం. • రోడ్లు, మురుగు కాలువలు, దోమల బెడదతో ప్రజల అవస్థలు.. సర్కార్ నిర్లక్ష్యంపై ఫైర్. • జహీరాబాద్ ఏరియా ఆసుపత్రిలో వైద్యుల కొరత, కనీస సౌకర్యాల లేమి. • ఇందిరమ్మ ఇళ్ల బిల్లులు చెల్లించాలి.. సమస్యలు పరిష్కరించకుంటే ఆందోళనలు ఉధృతం. నేటికేసరి జహీరాబాద్ సెప్టెంబర్ 1: ప్రజా సమస్యలను పరిష్కరించడంలో, కనీస మౌలిక వసతులు కల్పించడంలో రాష్ట్ర ప్రభుత్వం పూర్తిగా విఫలమైందని ఆరోపిస్తూ జహీరాబాద్ ఆర్డీవో (RDO) కార్యాలయం ఎదుట సీపీఎం (CPM) ఆధ్వర్యంలో మంగళవారం భారీ ధర్నా నిర్వహించారు. ఇటీవల సీపీఎం ఆధ్వర్యంలో నిర్వహించిన క్షేత్రస్థాయి సర్వేలో వెలుగుచూసిన పలు ప్రజా సమస్యలపై ఆర్డీవోకు నాయకులు వినతిపత్రం అందజేశారు. విద్యా, వైద్యంపై నిర్లక్ష్యం తగదు.. ఈ సందర్భంగా సీపీఎం జహీరాబాద్ ఏరియా కార్యదర్శి రాంచందర్ మాట్లాడుతూ.. విద్యా, వైద్య రంగాలను ప్రభుత్వం ఏమాత్రం పట్టించుకోవడం లేదని తీవ్ర స్థాయిలో మండిపడ్డారు. ప్రభుత్వ ఆసుపత్రుల్లో, విద్యా సంస్థల్లో కనీస సౌకర్యాలు లేవని, సరిపడా సిబ్బందిని, డాక్టర్లను నియమించడంలో సర్కార్ విఫలమైందని ధ్వజమెత్తారు. ముఖ్యంగా జహీరాబాద్ ప్రభుత్వ ఏరియా ఆసుపత్రిలో డాక్టర్ల కొరత తీవ్రంగా ఉందని, కనీసం అంబులెన్స్ సౌకర్యం కూడా సక్రమంగా లేక రోగులు నరకయాతన అనుభవిస్తున్నారని ఆవేదన వ్యక్తం చేశారు. రోడ్లు, డ్రైనేజీల పరిస్థితి అధ్వాన్నం.. పట్టణాలతో పాటు అనేక గ్రామాల్లో రోడ్లు, మురుగు కాలువల నిర్మాణాలు చేపట్టకపోవడంతో ప్రజలు తీవ్ర ఇబ్బందులు ఎదుర్కొంటున్నారని రాంచందర్ పేర్కొన్నారు. మురుగు సమస్యతో దోమల బెడద పెరిగి ప్రజలు రోగాల బారిన పడుతున్నా అధికారులు పట్టించుకోవడం లేదన్నారు. మరోవైపు పేదలకు ఇళ్లు, ఇళ్ల స్థలాలు ఇవ్వడంలో ప్రభుత్వం ఇచ్చిన హామీలు నీటిమూటలయ్యాయని విమర్శించారు. ఎప్పటి నుంచో పెండింగ్‌లో ఉన్న ఇందిరమ్మ ఇళ్ల బిల్లులను సైతం మంజూరు చేయకుండా లబ్ధిదారులను ఇబ్బందులకు గురిచేస్తున్నారని ఆగ్రహం వ్యక్తం చేశారు. తక్షణమే ప్రజా సమస్యలను పరిష్కరించే దిశగా ప్రభుత్వ అధికారులు చర్యలు చేపట్టాలని, లేనిపక్షంలో సమస్యలు పరిష్కారమయ్యే వరకు సీపీఎం ఆధ్వర్యంలో భవిష్యత్తులో ఆందోళన కార్యక్రమాలను మరింత ఉధృతం చేస్తామని రాంచందర్ హెచ్చరించారు. ఈ కార్యక్రమంలో సీపీఎం జహీరాబాద్ ఏరియా కమిటీ సభ్యులు ఎస్.మహిపాల్, నాయకులు సలీముద్దీన్, బాలరాజ్, బక్కన్న, సుకుమార్, శాంతమ్మ, శ్రీకాంత్, నర్సింలు తదితరులు పాల్గొన్నారు.